தமிழ் சினிமாவின் முன்னணி நடிகையான நயன்தாரா நடிப்பில், அறிமுக இயக்குநர் செந்தில் நல்லசாமி இயக்கத்தில், அதிரடி ஆக்சன் டிராமாவாக உருவாகிவரும் திரைப்படம் “ராக்காயி”. Drumsticks Productions தயாரிக்க, பிரபல இசையமைப்பாளர் கோவிந்த் வசந்தா இப்படத்திற்கு இசையமைக்கிறார். கௌதம் ராஜேந்திரன் ஒளிப்பதிவு செய்ய, பிரவீன் ஆண்டனி எடிட்டராகப் பணியாற்றவுள்ளார்.
இந்நிலையில், “ராக்காயி” படத்தின் டைட்டில் லுக் டீசர் வெளியாகியுள்ளது. நயன்தாரா பிறந்ததினத்தைக் கொண்டாடும் விதமாக இன்று வெளியிடப்பட்டுள்ளது.
இதுவரை பார்த்திராத அதிரடி ஆக்சன் அவதாரத்தில் நயன்தாரா டீசரில் சண்டைக் காட்சிகளில் தெறிக்க விடுகிறார். அதேநேரம், பின்னணியில் கோவிந்த் வசந்தாவின் இசையில் “விழிகளில் தீயாய் வாளேந்தி” பாடல் ஒலிக்க, டீசர் ஃபயர் மோடில் இருக்கிறது. இந்த டீசர் தற்போது இணையத்தில் பெரும் வரவேற்பைப் பெற்று வருகிறது.
புதுமையான கதைக்களத்தில், பரபரப்பான திரைக்கதையுடன், ப்ரீயட் ஆக்சன் டிராமாவாக உருவாகவுள்ள இப்படத்தை அறிமுக இயக்குநர் செந்தில் நல்லசாமி இயக்கி வருகிறார் என படக்குழு அறிவித்துள்ளது. மேலும், இப்படத்தில் நடிக்கவுள்ள மற்ற நடிகர், நடிகையர் பற்றிய விவரங்கள் விரைவில் அதிகாரப்பூர்வமாக அறிவிக்கப்படும் என்றும் தெரிவிக்கப்பட்டுள்ளது.
