2026 சட்டமன்றத் தேர்தலில் தவெக தலைவர் விஜய், தர்மபுரியில் போட்டியிடுவார் என தகவல்.
தமிழ்நாட்டில் 2026ம் ஆண்டு சட்டமன்றத் தேர்தல் நடைபெறவுள்ளது. இதற்கான பணிகளை தற்போது ஒவ்வொரு அரசியல் கட்சியும் துவங்கிவிட்டன. பொதுவாக ஒவ்வொரு தேர்தலிலும் ஒவ்வொரு அரசியல் கட்சியின் தலைவரும், முதல்வர் வேட்பாளரும், அந்தக் கட்சியின் நட்சத்திர வேட்பாளர்களும் எந்தத் தொகுதியில் போட்டி என்பது பெரும் ஆவலை கிளப்பும்.
கட்சியின் தலைவரும், முதல்வர் வேட்பாளரும் தங்கள் தொகுதியில் தான் போட்டியிட வேண்டும், போட்டியிடுவார் என்று அந்தந்தக் கட்சி நிர்வாகிகள் தங்கள் கட்சி உறுப்பினர்களிடத்திலும் தெரிவிப்பார்கள். இது அந்தக் கட்சியின் தலைவர் அங்கு போட்டியிடவில்லை என்றாலும், கட்சி நிர்வாகிகளுக்கு தங்கள் கட்சி பணியை செய்வதற்கு ஒரு உத்வேகத்தை கொடுக்கும்.
தலைவர்கள் தங்கள் தொண்டர்களின் விருப்பப்படி அந்தத் தொகுதியில் போட்டியிடவில்லை என்றாலும், அவர்கள் உற்சாகமாக வேலை செய்யவும், மக்கள் தேர்தலில் ஆர்வமாக வாக்களிக்கவும் “வேட்பாளர் தங்கள் கட்சியைச் சேர்ந்தவர் என்றாலும், நான் தான் இங்கு நிற்கிறேன் என்றே மக்கள் வாக்களிக்க வேண்டும்” என்றும் பேசுவார்கள்.
அதேபோல், மக்களுக்கும் ஒவ்வொரு கட்சியின் முதல்வர் வேட்பாளரும், நட்சத்திர வேட்பாளர்களும் எந்தத் தொகுதியில் போட்டியிடுகிறார்கள் என்பதை அறிவதில் ஆர்வமும் இருந்துவருகிறது.
இந்நிலையில், தர்மபுரி மாவட்ட தவெக வழக்கறிஞர் அணி பிரிவு ஆலோசனைக் கூட்டம் இன்று நடந்தது. இந்தக் கூட்டத்தில் பேசிய தவெக தர்மபுரி மாவட்டத் தலைவர் சிவா, “2026 சட்டமன்றத் தேர்தலில் தமிழக வெற்றிக் கழக தலைவர் விஜய் தர்மபுரி மாவட்டத்தில் உள்ள ஐந்து சட்டமன்றத் தொகுதிகளில் ஏதேனும் ஒரு தொகுதியில் போட்டியிடுவார்” என பேசியுள்ளார்.
